Hoe ontnugter voel ek nie nou dat ek besef dat ek weer die ou fout begaan het deur myself so in te leef in my eie wereldjie dat ek werklikheid of verskillende persepsies van werklikheid vergeet.
Ek kies doelbewus die woorde "denkbeeldige wereldjie" omdat dit is waarin ons vasgevang word: 'n klein gedeelte van die werklikheid. Kom ek verduidelik deur 'n voorbeeld te gee. So 'n paar jaar terug gaan ek deur 'n rowwe gedeelte van my lewe met huweliks-probleme. My vrou se ervaring was dat alles in ons huwelik verkeerd was. My ervaring was dat alles weer dood dollies was. Ek en my vrou se ervaring van dieselfde huwelik was verskillend. Toe gaan sien ons 'n beradder en ons kry weer 'n derde pretjie van iemand anders wat met meer insig in ons huwelik gekyk het.
Ek dink ons leef ons so in die wereldjie wat ons vir onself in ons kop geskep het dat ons nie oplet wat regtig gebeur nie. Dit is soos om na jou lewe en dit wat met jou gebeur te kyk deur 'n spesiale bril. Die bril se lense is dit wat ons glo ons sien of dit wat ons wil sien.
Partykeer is dit goed om weer net uit jou eie wereldjie geskud te word sodat jy weer kan ervaar dit wat ander ervaar.
Op die oomblik voel ek heel goed oor my lewe. Ek is nie waar ek wil wees nie maar ek werk daaraan. Dan kom die ontnugtering: dinge is glad nie so in plek soos ek gedink het dit is nie. My bril van wat werklik besig is om te gebeur kort instelling en fokus. Ek het nodig om weer veranderings binne myself te maak en dan sekere aksies te neem om my lewe in die regte koers te kry.
Ek nooi u uit liewe leser om ook weer deur nuwe brille na u lewe te kyk en te sien of dit wat jy gedink het jy sien nie net 'n wens was nie.
No comments:
Post a Comment